Èrpels steken

Èrpels steken, èrpels steken,
lange reken èrpels steken
Eêle daogen, lange weken
riek d’r onder en mao steken
J’n ând stevig rond den bos
dan krieg je die èrpels los
Goôi de groôte in de baole
de kleintjes gao je laoter aolen
laot die nog maor even liggen
die bin strèk voo ‘t jonge viggen
Je kook ze laoter in de schelle
een paor d’r uut en dan mao pellen
wà zout d’r op, da nie vergeten
iets lekkerders kun je nie eten
De groôte die gaon in de kuule
afgedekt mee riet of stroô
Noe gebeurt dat amao anders
maor in mîen tiet toen gieng da zoô
Deur da werken mee j’n annen
was je altiet dicht bie’t land
en ook al ao j’n zeêre rugge
en de blaoren op j’n and
je kenden bienao al j’n eten
wan ’t kwam van j’n eigen grond
‘t Was het voedsel voo je mond
Èrpels steken, boônen trekken
koôlen snieën, krootjes wieên
neuten raopen, tèrve dossen
’t Al gebruuken, niks vermossen
mee dank aon al die goeie grond
vul je elken dag je mond…

Jan Lauret, februari 2018