Wie zijn PietB & Jan Lauret

Wîen is Piet B

Ik bin opgheghroeid in Olland, ‘k èn voo fysiotherapeut geleêrd in Belgen. ‘k Èn ghewerkt in Zwitserland en Denemarken. Ik weunen ten noorden van Kopenhagen. ‘K Èn altîet gedichten geschreven mao pas noe voel ik me vrîe en èn ‘k de tîet om m’n poëzie te publiceren op het blog: www.pietb.com

Het is ook mogelijk om onze gedichten te volgen op Facebook: Piet B – Zeeuwse gedichten.

Ik laoten m’n eigen gèrn inspireren deu romantiek, ik zetten dikkels vraogteêkes bîe de saomenlevieng en ik verdiepen m’n eigen gèrn in het moôie van het leven in de naotuur.

Gèrn bedank ik m’n vrouwe Pia, die à me mee stevige onderhandeliengen  èlpt om de puntjes op de “i” te zetten …

Wîen is Jan Lauret

‘k Èn m’n leven lank in Olland geweund en gewerkt. ‘k Èn voo schoôlmeêster geleêrd. Da beroep èn ‘k vuuftien jaor uutgeoefend en daornao bin ‘k de wèreld van de educatieve uutgeverieë in gestept. Intussen een paor jaor Nederlands en Pedagogiek gestudeerd.

Nao m’n pensionerieng bin ‘k gaon schrîeven, zoôwel in m’n moers taol (Zeêuws Vlaoms dialect) as in het Nederlands. Verhaolen, raodiocolumns en gedichten (vèsjes). Inmiddels bin d’r tweê bundels mee verhaolen en columns in dialect en tweê romans in het Nederlands verschenen. Mee de manuscripten voor een verhaolenbundel en een nieuwe roman bin ‘k nog bezig.

Vedder geef ik leidieng aon tweê Leeskriengen en aon een Humanistisch café.

Elken dag lezen en schrîeven en bezig zîn in m’n groôten ôf maoken het leven levenswèrd.